Tuesday, August 29, 2006

غيّرنا العنوان




بعد التعديلات والتجديدات والتحديثات
لشوية حاجات ومحتاجات
انتقلنا الى هناك

Sunday, November 20, 2005




جريدة

مثل كل يوم وفى نفس المكان ونفس الموعد يجلس على نفس الكرسى ليقرأ نفس الجريدة .. نفس إبتسامة الإرتياح التى تُرسم على وجهه عندما ينتهى من تصفح الجريدة .. نفس الشعور الذى يراوده يومياً بأن الوضع فى تقدم مستمر .. يتحرك من مكانه ليمارس رياضة المشى .. يسأله أحد الأصدقاء

- البلد عاملة إيه النهاردة ؟؟
- الحمد لله .. الوضع فى تقدم مستمر

يستكمل سيره .. وعند نفس صندوق القمامة .. يتخلص من جريدته .

Saturday, November 19, 2005




اهداء
الى العجوز الممدد على أسفلت شارع الجمهورية بالمنصورة
وإليها .. نبضاتى المتأرجحة
!!


كان بيعّدى الشارع
خطوة خطوة بيعدى
كان بينفض المواجع
كان شايل حلم وردى
كان بيفكر ف الولاد
ف اللى فات
ف ايجار البيت المتأخر
ف البنت اللى ف بطن مراته
بتستنى الميلاد .
كان بيعّدى الشارع
خطوة خطوة بيعدى
بيفكر ف جده الطالع
بروحه للسما وبيبكى
كان نفسه يفرح
لما " سلمى " بتقوله
والفرحة ف عنيها بتغنى
( لو يعنى تسمح
" وليد " زميلى يقابلك
لجل ما يخطبنى )
ولسانه بيقول " منين "
جهازك منين .. فرحك منين
سكتنا ماشية لحد فين
وضحكتنا ملهاش بلاد .
كان بيعّدى الشارع
خطوة خطوة بيعدى
كان بيسأل اللى سامع
" لإمتى دايم صمتى ؟؟! "
كان بيسأل
لسه قد ايه ويوصل
سن المعاش
كان بيسأل
كام حلم مات ف الصغر
كام حلم عاش
كان بيسأل
" إمتى ييجى المعاد ؟؟! " .
كان بيعّدى الشارع
خطوة خطوة بيعدى
ونور قوى ف عينيه
نور قوى بيعميه
وكلاكس عالى
عربية صاحب المعالى
غصب عنه ارتبك
غصب عنه جسده واقع
غصب عنه جسده خاضع
مفيش ثوانى
وروحه طالعة للسما
والحلم طالع
لسه بينادى
اللى سامع
لسه بيناجى
ولا حد سامع !!
لسه بيردد نداه
والرد كان السكات !! .
قد ايه مخلوق ضعيف
قد ايه
دمه اللى غَرّق الرصيف
كان بيبكى الجميع
قد ايه
منظر الحلم الصريع
كان مخيف
قد ايه مشهد حزين
متفرجين ..
والدموع ف العينين
قد ايه مشهد حزين
جسده الضئيل
والكل ماشى
بيستكمل النزيف !!




رؤية للمرحلة الثانية من الانتخابات


مش عارف انما حاولت اتخيل شكل المرحلة التانية هيكون ازاى ..
بما ان الحزب الوطنى خسر كتير فى المرحلة الاولى يبقى اكيد فى تزوير اكتر فى المرحلة التانية .. اتوقع سقوط البدرى فرغلى وخالد محيي الدين ومحمد عبد الاله وابو العلا الحريرى .. اتوقع برضه ان الجبهة الوطنية مش هينجح منها كتير وهيكون الحزب الوطنى بعد ضم المستقلين فوق 100 عضو ناجح والاخوان حوالى 30 برضه
مش عارف بس دا تخيلى للشكل اللى هيحصل .. متهيالى برضه اسكندرية هتكون المخالفات فيها قليلة جدا وبورسعيد والقليوبية هتكون اكتر المخالفات كمان هتقل حكاية الصوت بفلوس دى وكمان السندويتشات والحاجات دى هتقل اكتر
عندى احساس ان شوبير هينجح بالتزوير وهيدخل مرحلة اعادة وينجح

الصراحة الانتخابات المصرية بقت غامضة وبقت عاملة زى مسلسلات الجاسوسية اللى ماتعرفش هيحصل فيها ايه او حقلة رعب فجأة تلاقى الوحش طلع مع انك عارف انه تمثيل انما انت مسلم انه وحش